உபரி வடைகளின்
நகரம் - சமகால கவிதைக் குரல்
கரிகாலன்
தமிழ் மொழியின் ஆதி இலக்கிய வடிவம் கவிதை. இப்போதும் கூட அதன் சீரிளமைத்திறன் வியக்கும்
வண்ணமாகவே உள்ளது. நாம் வாழும் இக்காலத்தில் கவிதைக்கான தளம் விரிவடைந்திருக்கிறது. முகநூல்களிலும் , குறுஞ்செய்திகளிலும்
கவிதைகள் காணக்கிடைக்கின்றன. நள்ளிரவுக்கவிஞர்கள் அன்றைய தினத்தின் கசப்புகளையும்
, இனிப்புகளையும் அன்றன்றே கொட்டித்தீர்க்கின்றனர். கவிதைக்கு நெருக்கமான ஒரு
வடிவத்தை இவ்வூடகங்களின் வழி வடிகாலாக்கியிருப்பது இன்றைய கார்ப்பரேட் பண்பாட்டின்
ஓர் அம்சம்.
இதே வேளையில் , அதிகார மதிப்பீடுகளிலிருந்து
விலகியும், அடையாள அழிப்பிற்குத் தப்பியும் , தங்கள் பார்வையை வரித்துக்கொண்ட
இளம் கவிஞர்கள் இருக்கவே செய்கிறார்கள். நமது பன்முகத்தன்மை கொண்ட சமூகக் குழுக்களின்
பிரதிநிதிகள் இவர்கள். சமகாலத்தில் எதிர்கொள்ளும் அரசியலிலிருந்து , பண்பாட்டு மதிப்பீடுகளிலிருந்து
கருக்கொண்டவை இவர்களது கவிதைகள். இசை , செல்மா பிரியதர்ஷன் , இளங்கோ கிருஷ்ணன்
, முத்துவேல் , வெய்யில் , தூரன் குணா , மனோ மோகன் என நீள்கிறது இத்தகைய இளம்
கவிகளின் பட்டியல். இவர்களது படைப்புகள் உலகின் சிறந்த கவிதை வரிசையில் இணைத்து
ஆராதிக்கப்பட வேண்டிய ஆற்றலும் , அழகும் கொண்டவை. இவ்வரிசையில் , லிபி ஆரண்யா
தவிர்க்க முடியாதவர்.
இவரது இரண்டாவது தொகுப்பான 'உபரி வடைகளின்
நகரம்' மூன்றாம் உலகின் அரசியலை அழகியல் கலந்த உரத்த தோனியில் விவாதிக்கிறது. பொதுவாக
, வெடிப்புறப் பேசுவது பெரிதன்று. அதை நகைச்சுவை உணர்வுடன் கூறுவது சாமர்த்தியமானது.
நகைச்சுவையை கலை வடிவமாக்குவது அதைவிடவும் முக்கியமானது. ஏனெனில் , கலகத்தின் இன்னொரு வடிவம்தான் நையாண்டி. இந்தக்
கலை கைவரப்பெற்றவராக லிபி திகழ்கிறார்.
வணிகமயமாகியிருக்கும் கல்வியை , அதிகார
சமூகம் கையளித்திருக்கும் பண்பாட்டு மதிப்பீடுகளை , வளர்ச்சியைக் கட்டமைப்பதில்
காவுகொடுக்கப் பட்டிருக்கும் பழங்குடிகள் உள்ளிட்ட எளிய மக்களின் நலன்களை கலைத்
தேட்டத்தோடு விவாதிப்பதில் கரிசனம் கொண்டவைகளாகத்
திகழ்கின்றன இவரது கவிதைகள்.
'ஒரு நல் மேய்ப்பனை / உங்கள் மந்தைக்குத்
திருப்பும் / துர் எண்ணத்தைக் கைவிடுங்கள்' எனக்கூறும் போதும் , ' பறவைகள் வந்தமர
முடியாதபடிக்கு / துயரத்தின் கிளையை விரித்திருக்கும் போன்சாயறியும் / நமது குழந்தைகளின்
வலியை ' என வேதனைப் படும்போதும் குழந்தைகளின் சுதந்திர உலகை நம் நவ கல்வி முறை
அதன் கோரப்பற்களால் எவ்வாறு கவ்விப் பிடித்திருக்கிறது என்பதை அறிய முடியும்.
இவரிடம் பாவனைகள் இல்லை. ' அடே ஒழுக்கசீலா
/ 2000 வருஷமாய் ஜல்லியடிக்கும் உங்கள் அறச்சாலையில்
/ ஒரு ஸ்கூட்டிக்கு வழிவிடுதலை விடவும் / ஆகச்சிறந்த அறமுண்டா சொல் / அப்படியே ஒரு 5000 சொல்'. மது விடுதிகளும் ஸ்கூட்டியில்
இளம்பெண்கள் விரையும் சாலைகளும் பகிரப்படாமல் எப்படித்தான் நம் சமகாலத்தை விவரிப்பது.
நம் காலத்திற்கு நெருக்கமானதாக இருக்கின்றன இவரது கவிதைகள்.
நமது வாழ்வை உரசிப்பார்க்கும் அரசியல்
முடிவுகள் எதுகுறித்தும் அக்கரையில்லாத நடுத்தர வர்க்க மனோபாவம் முடிவுக்கு வந்துகொண்டிருக்கிறது.
அணு உலைகளுக்கு எதிர்ப்பு , தேசிய இனங்களின் விடுதலைக்கு ஆதரவு , பெண்கள் மற்றும்
தலித்துக்கள் மீதான வன்முறைகளுக்கு எதிர்ப்பு என வீதியில் இரங்கிப் போராட படித்த
நடுத்தர இளைஞர்கள் முன்வரும் விழிப்புணர்வு பரவலாகி வருகிறது. இத்தகைய மனநிலை இத்தொகுப்பிலும்
செயல்பட்டிருப்பதை அவதானிக்க முடிகிறது.
இவ்வாறு கூறுவதால் லிபியின் கவிதைகள்
அரசியல் உள்ளடக்கம் கொண்ட வெற்று கோஷங்கள் என சுருங்கிப் புரிந்துகொள்ளக் கூடாது.
கவிதைக் கட்டமைப்பின் நுணுக்கமும் , பருண்மையான இழைகளால் நெய்யப்பட்ட கலை நயமும்
, கூர்மையான சொற்சேர்க்கைகளும் , சுருங்கக்கூறி பொருள் விரிக்கும் வித்தையும்
, கலை அமைதியும் கூடிய தொழில்நுட்பம் பழகியவை இக்கவிதைகள்.
நமது ஒருநாளின் மின்னி மறையும் கணங்களிலிருந்து
தனது கவிச்சித்திரத்தை உருவாக்குகிறார் லிபி. இக்கவிதைகள் உருவாக்கும் சலனங்கள் காத்திரமானவை.
வார்த்தைகள் உருவகங்களாகி நம்மை வாழ்வின் புதிருக்குள் பயணிக்க வைப்பவை. நுட்பமான
வினாக்களை உருவாக்க வைப்பவை. அமைதியை அழிப்பவை. கவிதைக்கும் , கவிதை போன்ற
ஒன்றிற்கும் இடையே உள்ள வேறுபாட்டை துல்லியமாக உணர வைப்பவை.
லிபி குறித்து சில மெல்லிய விமர்சனங்களையும் பகிர்ந்து கொள்ள வேண்டியிருக்கிறது. கவிதையை
மிகவும் எளிமைப் படுத்துவதிலும் , அதை உரைநடைக்கு அருகில் கொண்டு வருவதிலும்
உள்ள ஆபத்துகளை கவிஞர் உணர வேண்டும். தர்க்கங்களை
கலைப்பதும் , வார்த்தைகளைக் குறியீடாக்குவதும் , யதார்த்தம் கடந்த யதார்த்தங்களை உருவாக்குவதும்
மாய யதார்த்தங்களைப் புனைவதும் , இதுவா ? அதுவா? எனும் இருண்மையை ஏற்படுத்துவதும் கவிதையை மேன்மையுரச் செய்யும் நுட்பங்கள்.
இவ்வகையில் லிபி கடக்க வேண்டிய தூரங்கள் இருக்கவே செய்கின்றன. ஆறுதல் என்னவென்றால்
, இத்திசையில் இவர் பயணிப்பதற்கான அடையாளங்கள் இத்தொகுப்பிலேயே காணப்படுவதுதான்.
மேலும் , லிபியின் எள்ளல் கலை இன்னும் செரிவானதாக , இன்னும் மேன்மையானதாக ஆகும்
போது இவரது கலை உயரம் கூட வாய்ப்பிருக்கிறது. இரட்டைப் புலவர்கள் காலத்திலிருந்து
நாம் இக்கலையில் வல்லவர்கள் என்பதை மறந்துவிடக்கூடாது. இன்று , புதினங்களின் வரிகளில்
கவித்துவத் தெறிப்புகள் நிறைந்திருப்பதைக் காண்கிறோம். இதைக் கவிஞர்கள் சவாலாக
எதிர்கொள்ள வேண்டும்.
கடவுளின் அரியணை காலியாகலாம். ஒருபோதும்
கவிதையின் சிம்மாசனம் காலியாகப் போவதில்லை என்பதை நம்காலத்துக் கவிதைகள் நிரூபித்துக்
கொண்டிருக்கின்றன. லிபி ஆரண்யா போன்ற இளைஞர்களின் இயக்கம் இதற்கு உதவியாக அமைந்திருக்கிறது.
நமது சமகாலக் கவிதையின் வகைமாதிரியாகவோ அல்லது அதிலிருந்து விலகியோ ஒரு முக்கியமான
பாத்திரத்தை 'உபரி வடைகளின் நகரம்' தொகுப்பு
வகிக்கிறது. நமது சமூகத்தையும் , நமது கவிதையையும் விளங்கிக்கொள்ள எத்தனிப்பவர்களுக்கான
திறப்புகளை இந்த கவிதைகள் உள்ளடக்கியிருக்கின்றன.
தேடுபவர்களே எப்போதும் கண்டடைபவர்களாக இருக்கிறார்கள்.
உபரி
வடைகளின் நகரம்
லிபி
ஆரண்யா
விலை
ரூ.50/-
சந்தியா
பதிப்பகம்
சென்னை
- 83
